Wat send de aulen Kinnergeschichten wert?
Wer segg vandage no Klapperstuork? De Stüörke klappert vandage no jüst so
os vo 70, 80 un hunnert Johrn. Owwer de Welt es nöchterner worden. Domols
brochte de Klapperstuork no de lütken Kinner. Dat was spannend fo de ölleren
Geschwister. Un wenn in’n Duorpe en lütket Kiend to de Welt keimp, denn
har de Klapperstuork dat brocht, was doch klor.
Un wenn sik so en lütke Baußel denn affschlut en lütke Süster odder enen lütken
Broer wünsken dä, denn droffte he Zucker up de Fensterbank streuen, ümme den
Stuork antolocken. Of de Mama dat woll blauts volovte, wenn se sik wat in de
Möite keik? Denn har de Zucker doch holpen, dat was doch wat!
Un vandage? Do giff et ol in de ünnersten Klasse Sexualunnerricht.
De Unnerschäid van Junge un Lüd wed ganz pennibel an de Taofel mault. Man
kann met de Upklärung nich frouh genoug anfangen, hett et. De wat Politiker
wüllt je auk, dat de Gender-Doktrin in’t Schoulgesetz fasteschrieben wed.
Denn küönt de lütken Schöiler in iähre Fibel liäsen: Et giff Kinner, de hebt twäi
Papas, et giff Kinner, de hebbt twäi Mamas, et giff auk Kinner, de hebt ene
Mama un enen Papa, et giff auk Kinner, de hebt ene Mama, de mol en Papa
was, un et giff Kinner, de hebt enen Papa, de mol ene Mama was.
Ik kann mi do nich met anfründken, ik bin je auk van de aulen Welt.
Wie hadden bi use Utbildung to Jugendleiter os Referent enen klouken Professor,
de siär, man scholl lütke Kinner up düssen Rebett nie mehr votellen, os se
frauget, denn owwer ganz ehrlik antworden. Wenn se dat denn bedacht hadden,
keimen de neichsten Fraugen, un we güllt ene ehrlike Antwort up de Frauge,
nich mehr, süss dä man de Kinner üöwerföddern. Kinner van enen Johrgang
wörn in de Entwicklung auk längst nich lieke wiet. Mot man de sessjöhrigen
Kinner ol de ganzen Sexpraktiken üöwerstülpen?
Bedräige wi use Kinner met use niemoudsken Ansichten nich ümme en friehet
frohet Spiälen metenanner, Jungen un Lüdens, ohne Ächtergedanken?
Ik möchte miene friehe Kinnertied nich missen.
Lessens was ik bi ene Familie to Besöik. Do keimp de lütke Schöiler met uopen
Büxen in de Wuohnstuam, De Reißvoschluß klemmde, Mama möß helpen.
He löip in de Runne, tauhg sienen Penis lang un mende:
groß werden muß groß werden!
De Mama reageerde: Nich up achten, äinfach nich up achten!
≈ Elly Wübbeler ≈ |
