|
En schöne Parkbeld, owwer dor stäiht nich, dat düt Beld in Bad Essen knipst es.
Wer ton ersten mol up de Landstrauden L84 van Süden hiär üöwer den Biärg
no Bad Essen rinföhrt, wünnert sik villichte üöwer ene gröine Wisk met en
lütket schönet Hüsken, dat man van de Ort hiär so garnich in düsse Giegend
gewuohnt es. Düsse Pavillon heff auk ene wiete Räise achter sik, de kümp direkt
ut China, un de Wiske hett van amtswiagen de ‚Peter Rickmersplatz‘.
Peter Rickmers was de Süöhne van den grauten Briamer Kommerzienraot,
Schepsbauer un Welthannelsmann Rickmer Clasen Rickmers. De har ene äigen
Flotte, ene äigen Ostasien – Linie fo siene äigen Scheppe un ene äigen Werft.
Dor send 203 Scheppe baut worn, 88 dovan os Segelscheppe. Rickmers har 47
Fillialen in olle Welt. Dat 4-M Vullschepp, dat sienen Namen kreig un 1889
van’n Stapel löip, schall to de Tied dat schönste Schepp van de ganzen Welt wiän
sien, es owwer 1908 bi de Füerland-Inseln strandet, os et up den Weg van
New York no Rangun was.
Os de Süöhne van Rickmer Clasen Rickmers, Peter Rickmers (1838 – 1902)
an’n 4. Juni 1874 ton ersten mol no Essen keimp (was domols no nich ‚Bad‘),
was he van düsse Giegend met de Wiage, de woll so 2000 m in graute un lütke
Kurven up un dal dür den Biärg goht, so van andaon, dat he sik direkt an den
Hang van den Wiehen enen grauten Platz koffte un ene Villa bobben löit.
Hier konn he tüskendür jümmer we Urlaub maken un utspannen.
Dat besonners siet 1886, os he no den Daut van sienen Vadder de Firma
üöwerniähmen möß. Siene Fru Sophie kaimp ut Südfrankriek, un hier in Essen
wörd auk iähr Dochter Etha gebuorn.
Et wed vandage no votellt, dat Peter Rickmers, os he sik no enen Urlaub up den
Weg no Huus met Piärd un Kutsken no den Bahnhoff in Bauhmte bringen löit, up
halben Wiage den Kutsker touroppte: „Dreihe ümme! Föhr man we trügge, ik bliewe
doch no hier, kann mi no nich lösrieten van Essen.“
Peter Rickmers heff viäl fo Essen daun. Nich blauts met Geld, auk ene Witwen-
un Waisen-Stiftung kaimp düssen Duorp togohe, dat dür de Sole-Badeanstalt
siet 1902 den Titel ‚Bad‘ kreig.
Buterdem was Peter Rickmers en handfasten
Hobby-Botaniker.
De exotisken
Bäume in den Park bi siene Villa,
unner annern auk Taskendöiker-Böime, heff
he äigenhännig plantet un nomde se siene Kinner.
Fo sienen Park brochte he denn auk düt schöne
Teehüsken ut China met, wat nu
up den
Platz met sienen Namen stäiht.
Auk os he nich me liewede, kaimp faken no
siene Fru met de Kinner un met
Frünne ut Frankriek in de Villa.
Denn keimp de Krieg....
Intüsken es de Villa affriäten.
Auk dat Hotel, dat do bowwert wörd, stäiht nich
me.
Blauts de chinesiske Teepavillon, de bi dat viäle
Ümmepüöhlen in ol de
Johrden viäl van sienen
Zierraot voluorn heff, de stäiht nu up den
Rickmersplatz
un wahrt dat Andenken an düsse,
fo Essen so wichtige Familien-Fründskopp.
≈ Elly Wübbeler ≈ |
